Honetaz

Kuxkuxerook, niri buruz gehiago jakin nahi duzue, e? Ba hemen asetuko dut zuen jakinmina, (ez hain) maiz egindako galderak erantzunez.

Nor zara?

Orokorrean oso pertsona pribatua eta diskretua naiz. Halere, honatx niri buruzko zerbait:

1990eko hamarkada hasieran Bizkaian sortu eta hezitako gizasemea naiz. Begibistakoa da nire izena, ezta? Domeinua lortzean zapra izan nuen: asko gara lehen bataiatzailearen izenkide —Sabin Aranaren unituarekin, noski—, besteak beste. Lan lasterra, kasu honetan, ez zen lan alferra izan.

Ofizioz informatikaria —beti bit artean nonbait murgilduta ☺—, egunotan unibertsitate batean dihardut big data-rekin lanean: datu-base astronomikoak, alegia. Edo, beste modu batera esatearren, liburuzain digital bat naiz, orohar behar eta nahi baino gehiago laudatuak direnak.

Afizioz bibliofilo, bideojokalari, melomano eta zinemazale naiz batik bat. Mundu fisikoan egin daitezkeenak, ba bidaiatzea, txangoak ematea —natura eta hiri esplorazioa bereziki—, kirola… basikoxea naiz, nik uste. Bidenabar, jakingurari hobby dei dakioke? Bost axola. Teknofiloa izanik ere, humanitateek gizakian duten garrantzia aintzat hartzen dut: historia dut gogoko batez ere; eta hizkuntzalaritzan oso amateurra naiz, besteak beste.

Zer didatzu hemen?

Nire (in)kontzientzia-jarioa da hau. Denbora eta batez ere gogoa ditudanean, interneteko ene txoko honetan otutzen zaizkidan ideiak islatu, islatzen eta islatuko ditut, ganorazko kalitate-maila batera heldu nahian: artikuluak, kontakizunak, irudiak…

Blog pertsonala denez, eta norbanako batek burutazio asko dituenez, ez du gai finkorik. Nire afizioak eta ofizioak kontuan hartuta ba software (askea), zinema, musika, literatura, atzokotasunak, gaurkotasunak, politika, hizkuntzak, zientzia, filosofia… batek daki zer gehiago jorratuko ditudan hemen. Jarrai nazazue eta izan lekuko.

Zergatik dagizu hau?

Alde batetik, idazten dudanaren jabegoa nahi dudalako; egungo internet-a Ameriketako Estatu Batuetako mendebaldeko kostaldeko friki batzuek maneiatzen dute, ekialdeko inteligentzia-agentziek irakurtze-baimenak izateaz gain. Lehena saihestu nahi dut behintzat, bigarrena ezinezkoa zaigulako.

Bestetik, denbora aurrera joan ahala sare sozialak gero eta gehiago gorroto ditudalako. Gorroto baino, aspergarri bilakatzen ari dira, edukia funtsean errepikakorra bilakatu da-eta. iruzkinak barne. Horregatik, .eus domeinu bat eskuratu ostean, behingoz esklusiboki euskaraz idaztea erabaki nuen: hobe berandu inoiz ez baino. Areago, euskara esparru gehiagotan erabiltzeak beraren jakituria ugertzea ekidituko dit.

Nola dabil berau?

Software librearen zalea naiz duela urte askotatik, nahiz eta guztiz ez naizen konbertitu: Android eta batez ere Steamek oztopatzen naute aurrerapausua ematera.

Webgune hau Ruby programazio-lengoaian idatzitako Jekyll motore estatikoaz eraikia da; diseinua nik egokitutako minima gaia duelarik. Frantziako zerbitzari-eremu (server farm) ezezaguneko Debian makinan du kokapen fisikoa, nginx web zerbitzari duelarik. Kanpoko edukirik ez da zerbitzatzen.

Non zaurkitzaket?

Iruzkin-sistema baten faltan, niregana iristeko hainbat modu dauzkazue: